Watu 3 wamepigwa risasi kwenye tukio la ujangili eneo la Nosukuro, Baringo

Watu watatu wamepigwa risasi na kuuwawa katika tukio la punde zaidi la uvamizi katika eneo la Nosukuro, Baringo Kusini. Waathiriwa walikuwa malishoni waliposhambuliwa na majangili na kupigwa risasi huku mmoja akimudu kutoroka bila majereha yoyote. Miili ya watatu hawa hata hivyo haijapatikana tangu kutokea kwa tukio hili jana jioni. Hali ya taharuki imeendelea kutanda katika eneo hili huku kukiwa na hofu kuwa majangili wameanza kujipanga upya kwa mashambulizi. Hata hivyo, kamanda mkuu wa polisi Baringo Julius Kiragu amesema maafisa wa usalama wametumwa eneo hilo. Tukio hili limejiri majuma matatu baada ya polisi mmoja wa akiba kuuawa eneo hili.